АГЕНТИИ АВИАТСИЯИ ГРАЖДАНИИ НАЗДИ ҲУКУМАТИ ҶУМҲУРИИ ТОҶИКИСТОН

     Ҳамасола 7 декабр дар Ҷумҳурии Тоҷикистон ва дигар кишварҳо Рӯзи Байналмилалии авиатсияи гражданӣ – ҷашни касбии ҳамаи онҳое, ки кори онҳо бо осмон алоқаманд аст: халабонҳо, роҳбаладон, диспетчерон, кормандони техникӣ ва дигар мутахассисони соҳаи авиатсияи гражданӣ ҷашн гирифта мешавад.

     Санаи 28 ноябри соли 2024 бо дастгирии бевоситаи Асосгузори сулҳу ваҳдати миллӣ Пешвои миллат Президенти Ҷумҳурии Тоҷикистон муҳтарам Эмомалӣ Раҳмон  ва ташаббуси Агентии авиатсияи граждании назди Ҳукумати Ҷумҳурии Тоҷикистон ва ҶДММ «Ширкати ҳавопаймоии СомонЭйр» хатсайри Душанбе-Давҳа-Душанбе кушода шуд, ки ҳар ҳафта як маротиба ин хатсайр амалӣ карда мешавад. Муҳлати парвоз 3 соату 50 дақиқаро дарбар мегирад.

шаҳри Душанбе

     Санаи 28 ноябри соли 2024 дар толори Агентии авиатсияи граждании назди Ҳукумати Ҷумҳурии Тоҷикистон бо иштироки директори Агентӣ Назарзода Ҳабибулло Темур, сарнозири Раёсати муқовимат бо коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон, подполковники адлия Розиқзода Алихон Абдулҳаким ҷаласа баргузор гардид, ки дар он  сардорони раёсат, шуъбаҳо ва дигар кормандони Агентӣ,  намояндагони корхонаҳои авиатсионии кишвар иштирок намуданд ва дар он рафти иҷрои  “Стратегияи  давлатии муқовимат бо коррупсия дар Ҷумҳурии Тоҷикистон барои давраи то соли 2030” мавриди муҳокима  қарор гирифт.
     Дар оғози ҷаласа директори Агентии авиатсияи граждании назди Ҳукумати Ҷумҳурии Тоҷикистон Назарзода Ҳабибулло аз суханони Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон ёдовар шуданд: “Коррупсия зуҳуроти номатлуб ва барои ҷомеа хатарнок ба ҳисоб рафта, мубориза бар зидди он вазифаи асосии мақомоти  давлатӣ, ниҳодҳои ҷомеаи шаҳрвандӣ ва ҳар як сокини кишвар мебошад”. Ҳамчунин, қайд карданд, ки дар асоси гуфтаҳои Пешвои муаззами миллат муҳтарам Эмомалӣ Раҳмон ҳар яки мо хизматчиёни давлатӣ бояд бар зидди ин зуҳуроти номатлуб, ки тамоми кишварҳои ҷаҳонро фарогир аст, мубориза бурда, дар иҷрои вазифаҳои  худ содиқонаю софдилона хизмат намоем. Қайд гардид,  ки мақсади  роҳбарияти Агентии авиатсияи гражданӣ пешгирии омилҳои коррупсионӣ  буда, дар ҳар як маҷлису вохурӣ оид ба ин масъалаи доғи рӯз нисбати фаъолияти кормандони Агентӣ ва корхонаҳои зерсохтор ҳатман таъкиду дастурҳо дода мешаванд. Дар асоси ин гуфтаҳо бо пешниҳоди агентӣ қарори Ҳукумати Ҷумҳурии Тоҷикистон дар бораи ташкили дарвозаҳои электронӣ дар фурудгоҳҳои кишвар  ба имзо расид, ки иҷрои қарори мазкур ба пешгирии омилҳои коррупсионӣ  ва беҳтар гардидани сатҳу сифати хизматрасонӣ  ба мусофирон мусоидат хоҳад кард.
     Намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон ҷиҳати бандҳои дахлдори стратегияи мазкур суханронӣ намуда, азҷумла, оид ба беҳтар намудани фаъолияти комиссияҳои идоравӣ ҷиҳати пешгирии омилҳои коррупсионӣ, махсусан, гирифтани пораю туҳфа, суистифода аз мансаб, ғайримақсаднок истифода бурдани ашёи корӣ,   пардохти андози давлатӣ, иҷрои саривақтии санадҳои меъёрии ҳуқуқӣ дар иҷрои барномаю қонунҳои қабулшуда ва мувофиқи ихтисос қабули дурусти кадрҳо ибрози андеша намуданд.
     Дар охир директори Агентӣ ба намояндагони корхонаҳои авиатсионии кишвар дастур доданд, ки бо иштироки коллективҳои меҳнатӣ ҷиҳати мавзӯи болозикр ҷамъомад гузаронида, моҳияти он ба кормандон расонида шавад.

Ҳамватанони азиз!

Ҳамаи шуморо ба ифтихори Рӯзи парчами давлатӣ, ки рамзи соҳибихтиёрӣ, ваҳдату ягонагӣ ва сарфарозии миллати куҳанбунёдамон мебошад, самимона табрик мегӯям.

Ойини парчамдории халқи мо дар масири таърихи чандинҳазорсолаи он умеду ормон ва дастовардҳои мардуми сарбаланди мо, яъне давраҳои гузаштаи давлатдории тоҷикон ва даврони соҳибистиқлолии Тоҷикистони навинро таҷассум менамояд.

     Рӯзи Президенти Ҷумҳурии Тоҷикистон ҷашни бузурги миллӣ буда, рӯзи изҳори муҳаббат ва сипосгузории мардуми тоҷик барои хизматҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад.
     Бо дарназардошти эҳтиром ва эътирофи хиради азалӣ, фазилати сиёсатмадориву давлатдории навини кишвар, ба даст овардан ва таъмин намудани сулҳу ваҳдати сартосарӣ ва болоравии обруву эътибори мақоми Тоҷикистони соҳибистиқлоли мо дар арсаи ҷаҳонӣ, ки ин пайомадҳо дар маҷмӯъ ба салоҳиятнокиву фаъолияти босамари Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобастагӣ дорад, дар қонунгузории кишварамон Рӯзи 16 ноябр ҳамчун Рӯзи Президент таҷассум ёфтааст.
     Фазилати сиёсатмадориву давлатдории сарвари давлат муҳтарам Эмомалӣ Раҳмон боис гардид, ки дар кишвари мо сулҳу ҳамбастагӣ таъмин гардад ва обруву нуфузи Тоҷикистон дар арсаи байналмилалӣ боло равад. Маҳз бо меҳнати пайваста ва шабонарӯзии Президенти кишварамон Тоҷикистон тӯли солҳои соҳибистиқлолӣ ба шоҳроҳи созандагиву бунёдкорӣ баромад ва ба дастовардҳои беназир соҳиб гардида, ба як давлати амнтарин ва рӯ ба тарақӣ табдил ёфт.
Имрӯз мардуми шарифи Тоҷикистон хуб эҳсос мекунанд, ки Пешвои миллат сарфи назар аз ҳамаи мушкилоту монеаҳои мавҷуда, тамоми захираву имкониятҳоро барои беҳбуд бахшидани сатҳу сифати зиндагии аҳолӣ сафарбар менамоянд.
Маҳз шахсияти Пешвои миллат буд, ки халқи тоҷик аз парокандагӣ наҷот ёфт ва то охирин гурезаи тоҷик ба Ватан баргашт. Аз ин ҷост, ки хизматҳои бузурги ӯро миллат ҳаргиз фаромуш нахоҳад кард.
     Мо миллати хушбахтем, ки ба бахти мо тоҷикон таърих роҳбареро ҳамчун Эмомалӣ Раҳмон ҳадя намуд, ки ҳар лаҳзаи умри пурбаракати худро барои бунёдкорӣ, созандагӣ, меҳрпарастӣ ва арзишҳои миллии ин сарзамин сарф намуда, барои наслҳои ояндаи миллату кишвари тоҷикон дар роҳи эҷоди сулҳу ваҳдати миллӣ қадамҳои устувор мегузорад.
     Бинобар ин моро зарур аст, ки дар партави сиёсати ин абармарди таърих кору фаъолияти пурсамар намоем ва барои расидан ба ҳадафҳои судманди миллӣ аз тамоми имконот истифода намоем.
     Бигзор, хуршеди озодиву истиқлолият ба хонадони ҳар фарди кишвари маҳбубамон Тоҷикистон то абад файзу баракат ва нуру зиё бахшад.
     Рӯзи Президент муборак, ҳамватанони азиз!

     Агентии авиатсияи граждании назди Ҳукумати Ҷумҳурии Тоҷикистон ҷиҳати баланд бардоштани сатҳу сифати хизматрасонии ширкатҳои ҳавопаймоӣ ва ба инобат гирифтани манфиатҳои мусофирон дар вақти парвоз, бо ширкатҳои ҳавопаймоии хориҷии дуру наздик, хусусан ба ширкатҳои ҳавопаймоии Федератсияи Россия (“Уральские авиалинии”, “Сибирь”, “Северный Ветер”, ЮТэйр” ва “Ямал”), ки парвозҳоро аз/ба Ҷумҳурии Тоҷикистон ба анҷом мерасонанд, корбарӣ намуда, пешниҳод намуд, ки дар хатсайрҳое, ки давомнокии парвозҳо зиёда  аз 3.5 соат мебошад, мусофирон бо хӯроки гарм дар дохили ҳавопаймо таъмин карда шаванд.
     Вобаста ба ин, дар асоси пешниҳоди Агентии авиатсияи гражданӣ ширкатҳои ҳавопаймоии болозикр давомнокии вақти парвозро ба инобат гирифта, омодагии худро вобаста ба таъмини мусофирон бо хӯроки гарм дар дохили ҳавопаймо иброз намуданд.
Аз оғози мавсими тирамоҳу зимистони солҳои 2024-2025 (аз 1 ноябри соли 2024) ширкатҳои ҳавопаймоии ватаниву хориҷӣ мусофирони нақлиёти ҳавоиро, ки давомнокии парвозашон зиёда аз 3,5 соат мебошад, бо хӯроки гарм таъмин намуда истодаанд.
     Ҳамзамон қайд кардан ба маврид аст, ки Агентии авиатсияи граждании назди Ҳукумати Ҷумҳурии Тоҷикистон дар навбати худ ба масъулони хадамоти нозиротии фурудгоҳҳои байналмилалии Ҷумҳурии Тоҷикистон дастур додааст, ки иҷрои масъалаи болозикрро таҳти назорати ҷиддӣ қарор дода, аз натиҷааш мунтазам ба Агентӣ маълумот пешниҳод намоянд.

шаҳри Алмато

4-6 ноябри соли 2024 Директори Агентии авиатсияи граждании назди Ҳукумати Ҷумҳурии Тоҷикистон Назарзода Ҳабибулло Темур дар ҷаласаи якуми мақомоти авиатсионии минтақа ҷиҳати муҳокимаи ташаббуси таъсиси “Конфронси Авруосиёи авиатсияи гражданӣ” ва Семинари минтақавии арзёбии хавфҳо, ки дар шаҳри Алматои Ҷумҳурии Қазоқистон баргузор гардид,  иштирок намуданд.
Мақсад аз баргузории чорабиниҳои мазкур боз ҳам мустаҳкам намудани ҳамкориҳо дар соҳаи авиатсияи граждании кишварҳои дуру наздики аъзои “Конфронси Авруосиёии авиатсияи гражданӣ” буда, ин ташкилот ба нақша дорад, ки дар оянда низ гузаронидани семинарҳоро вобаста ба мавзӯи бехатарии парвозҳо ва омода намудани мутахассисон дар соҳаи авиатсияи гражданӣ бештар намояд.
Назарзода Ҳабибулло Темур дар семинари болозикр суханронӣ намуда, азҷумла қайд намуданд:
Бо қабули Эъломия дар бораи таъсиси "Конфронси Авруосиёии авиатсияи гражданӣ", Агентии авиатсияи граждании назди Ҳукумати Ҷумҳурии Тоҷикистон кӯшиш менамояд, ки бо шарикон барои табодули таҷриба ва дониш дар самтҳои муҳим, аз қабили бехатарии парвозҳо, бехатарии авиатсионӣ, соддагардонии расмият, рушди устувори авиатсияи гражданӣ, таҳияи системаҳои бесарнишини авиатсионӣ ва тайёр намудани мутахассисони авиатсионӣ фаъолона ҳамкорӣ намояд.
Тоҷикистон дар маркази стратегии Авруосиё воқеъ буда, ҳамчун долони муҳими нақлиётӣ, ки Осиёро бо Аврупо мепайвандад, хизмат мекунад ва омодааст, дар рушди инфрасохтори авиатсионӣ ва таҳкими ҳамкориҳои байналмилалӣ саҳмгузор бошад.
Илова бар ин, кишвари мо ба рушди авиатсияи гражданӣ, навсозии фурудгоҳҳо, беҳтар кардани шароити бехатарӣ ва васеъ кардани алоқаи ҳавоӣ аҳамияти калон медиҳад. Мо, иштирокчиёни ҷаласаи якуми “Конфронси Авруосиёии авиатсияи гражданӣ”, аҳамияти рушди авиатсияи гражданиро ҳамчун омили асосии пешрафти иқтисодӣ ва иҷтимоӣ, инчунин таҳкими робитаҳои фарҳангӣ ва тиҷоратии байни кишварҳои минтақаи Авруосиё эътироф менамоем.
Ҳамин тариқ, иштироки Тоҷикистон дар ин ҷаласа ӯҳдадории моро на танҳо ба рушди соҳаи авиатсионии худ, балки таҳкими ҳамкорӣ барои ҳалли мушкилоту вазифаҳои умумии минтақа таъкид менамояд. Мо омодаем ҳадафҳо ва вазифаҳои "Конфронси Авруосиёии  авиатсияи гражданӣ" - ро дастгирӣ намоем, барои татбиқи қарорҳои қабулшуда чораҳои мушаххас андешем ва барои фароҳам овардани шароит барои алоқаи бехатар, экологӣ ва дастрасии ҳавоӣ байни кишварҳои Авруосиё мусоидат намоем.

шаҳри Душанбе

     Инак, аз қабули Конститутсияи Ҷумҳурии Тоҷикистон 30 сол мегузарад ва давлати  мо дар заминаи меъёрҳои дар он муқарраршуда устуворона пеш меравад. Ин санади муқаддас, ки Истиқлолияти давлатии Ҷумҳурии Тоҷикистонро ба расмият даровард, орзую ормони ҳазорсолаи мардуми шарифи тоҷикро амалӣ сохта, роҳи ояндаи миллати сарбаланду созандаи моро ба сӯи бунёди ҷомеаи нав ва таҳкими пояҳои давлатдории муосир дар фазои давлати демократӣ, ҳуқуқбунёд ва дунявӣ мунаввар гардонид. Барпо кардани чунин давлат эҳтирому риоя ва ҳифзи ҳуқуқу озодиҳои инсон, ваҳдат, таъмини амният ва суботи устувори ҷомеа, фароҳам овардани шароити мусоид барои зиндагии арзанда ва инкишофи озодонаи ҳар як шаҳрвандро тақозо менамояд.
     Тавре Асосгузори сулҳу ваҳдати миллӣ Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон таъкид намудаанд: “Бузургӣ ва аҳамияти ин санади муҳимми таърихӣ пеш аз ҳама дар он ифода меёбад, ки нахустин аз ҷониби худи халқ бо роҳи озодонаи шаҳрвандони мамлакат қабул карда шудааст. Конститутсияи Ҷумҳурии Тоҷикистон худро қисми ҷудонашавандаи ҷомеаи ҷаҳонӣ шинохта, садоқатмандиашро ба арзишҳои ҳуқуқӣ изҳор намудааст”.
     Конститутсия, ки тамоми қонунҳо аз он сарчашма мегирад, барои пешрафт ва рушди давлат хизмат мекунад ва бахтномаи ҳар як миллат мебошад. Аз ин рӯ, Конститутсияи Ҷумҳурии Тоҷикистон воқеан бахтномаи миллати тоҷик аст, зеро он Конститутсияи мукаммале аст, ки ба қатори конститутсияҳои беҳтарини давлатҳои дунё аз ҷиҳати ҳифз ва эътирофи ҳуқуқу озодиҳои инсон ва шаҳрванд дохил карда шудааст.
     Шароити муосири ҷаҳонишавӣ ва торафт зиёд гардидани хатарҳои терроризму экстремизм тақозо менамояд, ки ҳар як шаҳрванди кишвар ҷиҳати риояи меъёрҳои Конститутсия ва дигар қонунҳои амалкунанда саъю талош намояд. Мо бояд амиқан дарк намоем, ки Конститутсия ва дар маҷмӯъ ҳама қонунҳо кафили сулҳу субот, воситаи муҳими таъмини озодӣ, адолати иҷтимоӣ ва баробарҳуқуқӣ мебошанд. Дар шароити имрӯза мо танҳо бо ҳамин роҳ метавонем, ки татбиқи ҳадафҳои неку созандаи пешгирифтаи давлати ҳуқуқбунёду демократии худро таъмин намоем ва заминаҳои адолати иҷтимоиро дар кишварамон тақвият бахшем.
     Тамоми кормандони соҳаи авиатсияи гражданӣ ва дар симои онҳо мардуми шарафманди Ҷумҳурии Тоҷикистонро бахшида ба 30-юмин солгарди Рӯзи Конститутсияи Ҷумҳурии Тоҷикистон самимона табрик намуда, бароятон саодатмандӣ ва ба кишвари азизамон ваҳдати ҷовидону истиқлоли абадиро таманно менамоям.